Nuusflits 19 Mei 2009

Beste ondersteuners,

“Gambarimasu!”, ‘n Japannese woord wat al vele male deur Japannese in gesprekke met ons hier beklemtoon is … vry vertaal beteken dit: “Vasbyt!” Dit, in kort, beskryf ‘n groot deel van ons eerste 6 weke in Japan. Ons leer op verskillende maniere om met geduld te volhard. Veral met die aanleer Japannees, maar ook met die afwagting op die koms van ons tweede kind (seun). En in die proses leer ons op nuwe maniere dink, leef en lag.

Bedrywig en gelukkig

Vandat ons in Tokushima ingetrek het, was ons program lekker volgepak. Ek is daagliks besig met taalstudie en vat maar babatreetjies met geduld! Verder het ek die drie preekgeleenthede by verskillende gemeentes in die eerste maand baie geniet. Ons het op hierdie manier heelwat nuwe mense ontmoet, en ook deur ons tuisgemeente se verrykende Retraite by die see hier naby ons huis. Lees meer hieroor (onder) in die nuusbrief van ons ouers en kollegas (Tobie en Annalie de Wet). Verder het ons ‘n paar gesinne by ons huis onthaal en selfs al uitbundig saam ge-Karaoke!  Annlie is ongetwyfeld die grootste trekpleister orals waar ons beweeg. Haar blonde hare en eindelose energie laat mense konstant in hulle spore stuit en staar sonder skaamte.  Sy maak dit baie maklik om ‘n gesprek aan te knoop en onsself aan iemand voor te stel (Annlie buig selfs gepas vooroor met die groet-slag!). In die vele parkies en stapplekke naby ons huis ontmoet ons gereeld nuwe mense en kry Annlie oorgenoeg kans om te baljaar. ‘n Wonderlike Finse sendeling-gesin het o.a. ook vir ons ‘n kattebak vol speelgoed ens. gegee, en nou is sy omtrent in haar element …

Ons wil jou graag deel maak van ons leefwêreld

Iemand skryf onlangs in ‘n e-pos vir my “Ek weet so min van Japan”. Ek kon dadelik identifiseer aangesien ek ‘n paar jaar gelede nie eers geweet het dat Tokyo, en nie Hong Kong nie (!), die hoofstad is van Japan. Ek vermoed heelwat ondersteuners weet ook relatief min van die land en haar mense. Ons hoop om deur middel van hierdie nuusbrief en dié wat sal volg vir jou ‘n klein venstertjie oop te maak op die lewe en mense in Japan. Ons sien dit as deel van ons verantwoordelikheid om jou as ondersteuner op hoogte te hou van wat hier gebeur … sodat jy ook toegerus word om met meelewing vir Japanners om te gee. Dit sal óns ook natuurlik in die proses (van terugvoer gee) help om nuwe betekenis te ontdek in dit wat ons hier deurleef. Op dié manier bly ons in voeling met wat hier gebeur en betrek jou direk daarby.

Kom ons skype…

Hierdie afgelope Sondag het ons wonderlike direkte gesprekke gevoer met baie mense in Aliwal-Noord en Paarl, tydens hulle eredienste. Die paar minute se kontak (hoorbaar en sigbaar op die groot skerms) was wedersyds baie bemoedigend en ons nooi graag ander gemeentes uit om ook tyd in te ruim hiervoor in die toekoms. Dit skep dieper betrokkenheid wat broodnodig is. Laat weet net, dan reel ons dit. Laat weet gerus ook as jy foto’s met groter resolusie of enige ander inligting benodig, dan stuur ons dit aan. Kom ons hou die kommunikasie kanale warm.

‘n Nuwe benadering

Ons wil graag in die toekoms korter en ‘n bietjie meer gereeld (elke 2-3 weke) skryf. Die nuusbrokkies sal (hopelik) elke keer kreatief wees en ook veral gepaard gaan met ‘n foto of twee oor die spesifieke gebeure of idees wat ons met jou wil deel. Miskien kan gemeenteleiers dit ook sinvol gebruik in hulle nuusblaadjies. Ons is besig om ons webtuiste (uiteindelik!) hiervoor gereed te kry…

Kinderdag Kultuurbrokkie

Vroeër hierdie maand (5 Mei) is Kinderdag (KODOMO NO HI) as nasionale vakansiedag in Japan gevier. Dit is reeds sedert 1948 ‘n vaste instelling. In hierdie tyd word kinders se geluk en gesondheid gevier en hulle uniekheid en persoonlikhede gerespekteer. Kinders is immers een van ‘n nasie se grootste bates. Orals rondom ons wapper “visvlae” (sien ook bg. foto ter illustrasie) in stelle van vier of meer. Die swart karp (aan die bopunt) verteenwoordig die pa, die rooi karp verteenwoordig die ma, en die laaste een verteenwoordig die seun, met ‘n addisionele karp/karpe wat vir elke opeenvolgende seun wapper, met ‘n unieke kleur en posisie in verhouding tot hulle ouderdom en posisie in die gesin.

Die vlae simboliseer (energieke en sterk) karpe wat moedig stroomop swem.  Met die bedoeling dat veral seuns ook moedig en sterk sal leef … “En wat van die dogters?”, vra jy dalk saam met my. Kinderdag was oorspronklik NET seuntjies-dag en boonop ‘n openbare vakansiedag. Dogtertjies het wel hul eie dag, maar dit is bloot ‘n gewone kalenderdag!? Dit het eers baie onlangs ‘n meer gender-vriendelike Kinderdag geword, alhoewel meeste mense steeds die tradisionele waardes van krag en moed uitsluitlik aan seuntjies verbind … Hoe dan so? Laat mens wonder, né! Laat ons weet wat jy dink hiervan…

Lees gerus by hierdie skakel meer oor die oorsprong van hierdie interessante herdenking wat reeds voor die Samurai –era dateer – http://www.ginkoya.com/pages/childrensday.html

Bid asb. saam met ons deur… 

• Dankie te sê dat ons prakties alles het wat ons nodig het om hier te leef en werk, en vir almal wat ‘n aandeel het in die voorsiening daarvan (huis, motor ens.)
• Dankie te sê vir ons ongebore baba (nou 38 weke) en vra vir krag vir Carina vir die geboorteproses (waarskynlik DV binne die volgende paar dae).
• Dankie te sê vir 3 verskillende dosente onder wie ek tans taalstudie doen, en vra vir volharding, geduld en dissipline in die proses.
• Dankie te sê vir baie mense met wie ons tot dusver kon kennis maak, en vra dat verhoudings sinvol sal verdiep.
• Dankie te sê vir ‘n wonderlike vriendin wat hierdie brief telkens gratis in Engels vertaal.
• Vra vir ondersteuning deur gemeentes en individue wat nog hul betrokkenheid oorweeg.

Vrede

Stéphan, Carina en Annlie

Adres:

Sangenya Chou, Soto 23 – 20

Tokushima City, 770-8025

Japan

Tel: 088 678 7310

Skype-naam: stephancarina