Rampliturgie-flits – 8 Maart 2012

Beste vriend/vriendin,

Eergister vind ek Cornelius (ons 2-jarige) tussen die stoele onder ons kombuistafel, en sê-vra, “speel jy lekker daaronder?”, waarop hy antwoord: “daar is ‘n aardbewing!”. Gelukkig was daar nie toe een nie, maar ons oefen lank reeds aan ons plan van aksie indien ‘n ramp gebeur, en hy is blykbaar slaggereed. So tussen die lag deur was sy woorde in dieselfde asem, ‘n tydige herinnering aan een van die moeiliker werklikhede van ons lewe in Japan, waarvoor ons altyd waaksaam is. Die wete is versterk toe ek vanoggend oppad was na ons plaaslike immigrasie-kantore (geleë naby die hawe), en hoor hoe die radio-omroeper verduidelik hoe om beserings te voorkom tydens van ‘n aardbewing … en toe, net buite die kantore, kyk ek vas in ‘n kaart met ‘n stap-vir-stap verduideliking waarheen om te vlug indien ‘n tsunami in daardie area sou voorkom …

‘n Verslae werker peins oor die verwoesting by Onagawa

Eerskomende Sondag is 11 Maart, ‘n somber herinneringsdag aan die verskrikking van een jaar gelede. Tydens ons erediens in Tokushima gaan ek probeer om in Japannees iets uit die Bybel en uit my hart oor te dra oor die Lig van God in ons alledaagse worstel en seer, en veral in die lig van die duistere gebeure van 11/3/2011 in Japan.

Bid asb. spesifiek saam met ons vir Japan hierdie Sondag. En as jy moontlik iets hiervan in jul gemeente wil deel, hier is 3 maniere om dit deel van die liturgie te maak: 

• Lees asb. hier onder ‘n kort brief van Gideon van der Watt, sekretaris van Missie Japan, en deel dit in jou gemeente/selgroep. Lees verder ook die amptelike brief wat Danie Mouton namens Missie Japan bestuur en die NGK-familie aan die RCJ geskryf het.
• Laai ‘n Japannese lied (MP3-formaat) getiteld Die Hoop, af by www.ngkok.co.za/missiejapan/default.htm . Luister dit tydens Sondag se liturgie in julle erediens / saam met gebedsvriende. Die lirieke is in powerpoint­-formaat – in Afrikaans ens. Dalk wil jy die Japannees ook daarna vertoon om iets van Japan te versinnebeeld terwyl die lied gehoor word. Die lied begin outomaties speel terwyl die woorde verskyn (dis vanaf 8 Mrt 13h00 beskikbaar). Dit is spesifiek geskryf n.a.v die rampgebeure, deur ‘n Finse sendeling-paar, Harri and Elina Huovinen (kennisse van ons). Hulle het kopiereg op die lied, maar het spesiaal toestemming verleen dat dit gebruik kan word vir hierdie doel.
• Lees die moderator van die RCJ, ds. Yoshida se aangrypende getuienis oor sy ervaringe as deel van die Sendai-gemeente, midde-in die rampgebied, getiteld The Church’s response to theological and practical challenges … neem dit in jou hart in, deel dit met ander en raak op ‘n klein manier deel van baie van jou Japannese Christen broers en susters se worstelinge en hoop.

Dankie vir jou meeleef hierin.

Vrede

Stéphan, Carina, Annlie, Cornelius en Lodewyk

NS: Indien jy hierdie maand ook wil bid vir ons bediening in Shikoku-eiland, kliek hier vir ons gebedsflits.

NS 2:  As jy wil kyk na ‘n kort foto-vertoning van Tobie en Annalie se onlangse verwelkoming- en dankie-sê geleentheid buite Stellenbosch kliek hier.

**Baie dankie aan Sakkie Nel vir die foto-vertoning, en aan Danie Mouton vir die plasing van die lied en powerpoint.

———————————————————————————————————————————————————————————————————————————-

Eerskomende Sondag, 11 Maart 2012, sal dit presies ‘n jaar wees sedert die verskriklike drie-dubbele ramp – die aardbewing, tsoenami en kernongeluk – Japan getref het. Meer as 26 000 mense is oorlede, honderde duisende het geliefdes, huise, alles verloor. Hoewel daar mooi gevorder word met die heropbou van die gemeenskappe, het die diep emosionele en geestelike wonde nog lank nie genees nie. Dis juis nou die fase waarin mense eensaam voel en moed verloor.

Op uitnodiging van Missie Japan het ‘n groepie verteenwoordigers van die Reformed  Church in Japan pas ons land besoek. Onder hulle was die moderator Ds Yoshida (hy is ook leraar in Sendai) en Ds Tateishi (wat die kerklike hulpprogram in die gebied koördineer). Hulle het kom dankie sê vir die rampfonds uit Suid Afrika waarmee die werk ondersteun word. Hulle vra ons voortgesette voorbidding vir die mense wat so diep geraak is deur die gebeure, veral die baie ontwrigte kinders. Hulle vra ook voorbidding vir die kerk en die Christene se betrokkenheid in die rampgebied. Missie Japan het ook pas besluit om vir Ds Tobie en Annalie de Wet weer vir drie maande na die rampgebied te stuur om daar te gaan help. Ons versoek gemeentes om eerskomende Sondag spesiaal te bid vir die mense wat deur die rampgebeure geraak is.  

Baie dankie

Gideon van der Watt